Prezidentimiz rahbarligida bugungi kunda mamlakatimizda xotin-qizlarni har tomonlama qo‘llab-quvvatlash, siyosiy, ijtimoiy-iqtisodiy hayotdagi faolligini yanada oshirishga alohida e’tibor qaratilmoqda.

Xotin-qizlarni har tomonlama qo‘llab-quvvatlash, ularni e’zozlash, shuningdek, barcha sohalarda samarali faoliyat olib borayotgan va oilalar mustahkamligini ta’minlashda  o‘z hissalarini qo‘shib kelayotgan faol xotin-qizlarni rag’batlantirish, namunali kasbiy mahorati bilan boshqalarga ibrat bo‘lgan mehnat faxriylarini ulug’lash kabi ishlarda kasaba uyushmalari bevosita faol ishtirok etib kelmoqda.

Jumladan, jamoa kelishuvlari va shartnomalari orqali davlat dasturi asosida, “Kasaba uyushmalari-xotin qizlarga” aktsiyasi doirasida 3835 nafar xotin-qizlarga sovg’alar topshirilgani bu boradagi ishlarning yorqin misolidir.

2024 yil 6 mart kuni O‘zbekiston kasaba uyushmalari Federatsiyasining Qoraqalpog’iston Kengashi tomonidan 8-mart – Xalqaro xotin-qizlar kuni munosabati bilan “Ayollari qadr topgan yurt” mavzusida bayram kechasi o‘tkazildi.

Unda shahar va tumanlardan tashrif buyurgan onaxonlar, faol xotin-qizlar, turli vazirlik va idoralar vakillari qatnashdi.

Tadbirni Senator O‘zbekiston kasaba uyushmalari Federatsiyasi raisi o‘rinbosari, Qoraqalpog’iston kengashi raisi U.Jalmenov ochdi va ma’ruza qildi. Jumladan, Prezidentimiz Sh.Mirziyoev xotin-qizlarning salomatligini mustahkamlashga oid yurtimizda amalga oshrilayotgan islohotlar, jamiyatda o‘z o‘rniga ega bo‘lishlari yuzasidan olib borilayotgan sa’y-harakatlar va bu boradagi mislsiz imkoniyatlar samarasiga to‘xtalib, qaysi sohada bo‘lmasin ular o‘zlarining mehnatsevarligi,matonati bilan erkaklar bilan bir safda faoliyat yuritib kelayotgani xususida ta’kidladi.

Bayram kechasida Vatanimiz taraqqiyoti yo‘lida samarali mehnat qilayotgan, jamiyat hayotining barcha sohalaridagi fidoyi xotin-qizlar va mo‘’tabar onaxonlarimizdan bir guruhi O‘zbekiston kasaba uyushmalari Federatsiyasining Qoraqalpog’iston kengashi tomonidan Faxriy yorliq va esdalik sovg’alar bilan taqdirlandi.

Tadbir davomida yangragan kuy-qo‘shiklar ishtirokchilarga chinakam bayramona kayfiyat ulashdi.