Eger kárxana, shólkem, mekemelerde kásiplik awqamı shólkemi bolmasa ol qanday dúziledi?

Eger siz miynet etip atırǵan kárxana, shólkem, mekemelerde kásiplik awqamı shólkemi bolmasa, keminde 5 ten kem bolmaǵan kásipleslerińiz benen birgelikte onı dúziwińiz múmkin.

Bunıń ushın qaysı taraw kásiplik awqamına kirmekshi bolsańız sol tarmaq kásiplik awqamınıń ustavı menen tanısıp shıǵıń.

Sonnan keyin kárxana (shólkem, mekeme) miynet jámáátiniń ulıwma jıynalısı (ulıwma jıynalıs shaqırıwdıń imkanı bolmaǵan iri kárxanalarda konferenciya) ótkerilip, kásiplik awqamı shólkemin dúziw hám qaysı tarmaq kásiplik awqamı sistemasına kiriw haqqında qarar qabıl qılınadı.

Jıynalıs (konferenciyada) sonday-aq:
– 15 ke shekem kásiplik awqamı aǵzasın birlestirgen baslanǵısh kásiplik awqamı shólkemine – kásiplik awqamı shólkemlestiriwshisi, onıń orınbasarı hám esapshısı;

– 15 hám onnan artıq kásiplik awqamları aǵzaların birlestirgen baslanǵısh shólkemde – kásiplik awqamı komiteti hám (eger baslanǵısh shólkem ayrıqsha esap betine iye bolsa) tekseriw komissiyası saylanadı.

Baslanǵısh shólkem shólkemlestirilgennen soń on kún múddette bul haqqında qaysı tarmaq kásiplik awqamına kirmekshi bolsa, sol kásiplik awqamınıń aymaqlıq shólkemine (rayon, qala keńesi, walayat birlesken komitetine), olar bolmaǵan táǵdirde – kásiplik awqamı Respublika keńesine xabar qılınadı.

Baslanǵısh shólkemniń usı xatı tiykarında kásiplik awqamınıń joqarı shólkemi baslanǵısh shólkemdi kásiplik awqamı xızmetine qabıl qılıw, onıń esap betin ashıw hám mórin tayarlaw haqqında qarar qabıl qılınadı.