Nókis qalasında mádeniyat hám sport salasında miynet etip atırǵan hám de tálim alıp atırǵan jaslar menen ushırasıw ótkerildi.

2026-jıl, 8-oktyabr kúni Ózbekstan mámleketlik kórkem óner hám mádeniyat institutı Nókis filialında jaslardı qollap-quwatlaw, olardıń miynet huqıqları hám máplerin qorǵaw, kásiplik potencialın asırıw hám de baslamaların xoshametlewge qaratılǵan ushırasıw shólkemlestirildi.

Ushırasıwda Ózbekstan kásiplik awqamları Qaraqalpaqstan keńesi baslıǵı U.A.Jalmenov, Qaraqalpaqstan Keńes baslıǵınıń jaslar máseleleri boyınsha másláhátshisi N.Aliev hám Ózbekstan mádeniyat, sport hám turizm xızmetkerleri kásiplik awqamı Qaraqalpaqstan Respublikası birlesken komiteti baslıǵı J.Ayapovlar qatnastı.

Ilajda jaslar menen ashıq hám kewilden sawbetler ornatılıp, olardı qıynap atırǵan máseleler, usınıs hám baslamaları tıńlandı. Jas qánigelerdiń óz salasında belsendi bolıwı, jańa ideyalardı ilgeri súriwleri hám de jámiyetlik jumıslarında múnásip qatnasıwı zárúr ekenligi aytıp ótildi.

Sonıń menen birge, jaslardıń miynet huqıqların támiyinlew, múnásip miynet sharayatların jaratıw, olardıń social-ekonomikalıq máplerin qorǵawda kásiplik awqamlarınıń ornı jóninde pikir almasıldı.

Ilaj juwmaǵında tarawda belsendilik kórsetip kelgen birneshe jaslarǵa Minnetdarshılıq Diplomları tapsırılıp, olarǵa kelesi iskerliginde jetiskenlikler tilendi.