1-oktyabr – «Muǵallimler hám ustazlar kúni» bayramına baǵıshlap Ózbekstan bilimlendiriw hám ilim xızmetkerleri kásiplik awqamı Nókis qalalıq bólimi tárepinen Nókis qalalıq mektepke shekemgi hám mektep bilimlendiriw bólimi menen birgelikte usı jıldıń 19-sentyabr kúni Nókis qalasındaǵı ulıwma bilim beriw mákemelerinde jumıs alıp barıp atırǵan xızmetkerler arasında sporttıń badminton túri boyınsha sport jarısı ótkerildi.

Ótkerilgen sport jarısına qaladaǵı barlıq bilimlendiriw mákemelerinde jumıs isleytuǵın xızmetkerler qatnasıp, ózleriniń fizikalıq qábiletin hám shaqqanlıǵın kórsetip, óz-ara bellesti. Qızǵın báseki hám mawasasız gúresler astında ótken jarıs xızmetkerlerdiń sportqa bolǵan qızıǵıwshılıǵın jáne de arttırıp, olardıń jeńiske bolǵan umtılısın bekkemledi. Barlıq qatnasıwshılar jarısta jeńimpaz bolıw ushın shın kewilden háreket etti.

Jarıs juwmaǵında jeńimpaz bolǵan qatnasıwshılarǵa Ózbekstan bilimlendiriw hám ilim xızmetkerleri kásiplik awqamı Nókis qalalıq bóliminiń keńesi tárepinen estelik sawǵaları hám diplomlar tapsırıladı.