Xalıqaralıq miynet shólkemi tárepinen 2002-jıldan berli 12-iyun sánesi «Xalıqaralıq balalar miynetine qarsı gúresiw kúni» sıpatında hár jılı keń túrde belgilenip kelinbekte.

Usı jılıda sáne múnásibeti menen bir qatar ilajlardı ámelge asırıw rejesi belgilep alınǵan.

12-iyun – «Xalıqaralıq balalar miynetine qarsı gúresiw kúni» múnásibeti menen Ózbekstan bilimlendiriw hám ilim xızmetkerleri kásiplik awqamı Nókis qalalıq bólimshesi keńesi baslaması menen usı jıldıń 12-iyun kúni Nókis qalasındaǵı «Aral» balalar dem alıw hám salamatlastırıw orayında ruwxıy-aǵartıwshılıq hám sport ilajları ótkerildi.

Ótkerilgen ilaj Xalıqaralıq miynet shólkemi (XMSh) tárepinen alǵa qoyılıp atırǵan «Balalar miynetine qızıl kartochka: balalar ushın ádil oyın, úlkenler ushın múnásip miynet!» súreni astında shólkemlestirildi.

Ilajda Ózbekstan kásiplik awqamları Federaciyası Qaraqalpaqstan keńesiniń Mádeniy-aǵartıwshılıq hám sport isleri bólimi qánigesi B.Munnazarov hám Ózbekstan bilimlendiriw hám  ilim xızmetkerleri kásiplik awqamı Nókis qalalıq bólimi keńesiniń baslıǵı M.Daulbaevlar qatnasıp, búgingi sáne menen dem alıp atırǵan balalardı qızǵın qutlıqlap, balalar miynetine qarsı gúresiwdiń búgingi kúndegi áhmiyeti, elimizde jas áwlad ushın jaratılıp atırǵan sheksiz imkaniyatlar haqqında hár tárepleme toqtap ótti.

Ilaj dawamında dem alıw ornında dem alıp atırǵan balalar arasında sporttıń shashka, stol tennisi túrlerinen jarıslar hám erkin temada súwret salıw boyınsha kórik-tańlaw ótkerildi. Ótkerilgen jarıslar hám tańlawlar juwmaǵında jeńimpaz hám sıylı orın iyeleri anıqlanıp, olarǵa bólimshe keńesi tárepinen tayarlanǵan diplom, bahalı sawǵalar hám oqıw quralları toplamı tapsırıldı.

Sáne múnásibeti menen ótkerilgen ilajlar dem alıp atırǵan balalarda úlken tásir qaldırdı.