Ózbekstan kásiplik awqamları Federaciyasınıń Qaraqalpaqstan Keńesi májilisi zalında usı jıldıń 31-yanvar kúni Ózbekstan bilimlendiriw hám ilim xızmetkerleri kásiplik awqamı Nókis qalalıq bólimshesi quramındaǵı bilimlendiriw mákemelerinde islep atırǵan kásiplik awqam aǵzaları hámde Ózbekstan isbilermenlik, biznes hám xızmet kórsetiw tarawları xızmetkerleri kásiplik awqamı Qaraqalpaqstan Respublikası birlesken komiteti quramındaǵı mákemelerde islewshi kásiplik awqamı aǵzaları qatnasında «Kitap-ruwxıylıq aynası» atamasında «Ruwxıylıq saatı» ótkerildi.

Ótkerilgen «Ruwxıylıq saatı»na Ózbekstan hám Qaraqalpaqstan jazıwshılar awqamı aǵzası, Qaraqalpaqstanǵa miyneti sińgen mádeniyat xızmetkeri, Doslıq ordeni iyesi Gulistan Dauletova, Ózbekstan hám Qaraqalpaqstan jazıwshılar awqamı aǵzası, Ózbekstan xám Qaraqalpaqstan Xalıq bilimlendiriw aǵlası Oralxan Saparovalar qatnasıp, kitaptıń insan ómirindegi áhmiyeti, kitap oqıwdı hár bir shańaraqta úrdiske aylandırıp, insanlardıń kitap oqıwǵa qızıǵıwshılıǵın arttırıw boyınsha ózleriniń ómir sabaqların aytıp berdi. Sonday-aq, G.Dauletova óziniń jazǵan qosıqlarınıń dóreliw tariyxı, jazǵan qosıqlarına kompozitorlar tárepine namalar shıǵarılıp xalqımızǵa keńnen tarap atırǵanların aytqan bolsa, al O.Saparova óziniń jazǵan «Táǵdir soqpaqları», «Qaydasań CHinara», «Úsh avtordıń bir qaharmanı» hám t.b atamada jazǵan kitaplarınan úzindiler oqıp berdi.

«Ruwxıylıq saatı» qatnasıwshılarınan Nókis qalalıq 6-sanlı mektep muǵallimi N.Allamuratova, 1-sanlı mektep muǵallimleri G.Qurbanbaeva hám A.Mustafaevalar ózlerin qızıqtırǵan sorawların berip, maǵlıwmatqa bay juwaplar aldı.

Ótkerilgen «Ruwxıylıq saatı» júdá qızıqlı hám qatnasıwshılardı úlken tásirler qaldırǵanday tárizde mazmunlı bolıp ótti.