11 noyabr — Ózbekstan kásiplik awqamları kúni bayramı qabatında usı jıldıń 7- noyabr kúni Qońırat soda zavodında Ózbekstan kásiplik awqamları Federaciyasınıń  Qaraqalpaqstan keńesi baslıǵı, senator U.A.Jalmenov hám kásiplik awqamları belsendeleri menen birgelikte zavod iskerligi menen tanıstı.

Qońırat soda zavodında miynetkeshlerdiń sociallıq-ekonomikalıq mápleri hám miynet salasındaǵı huqıqları is beriwshi hám de kásiplik awqam komiteti sociallıq sherikliginde bekkem qorǵawǵa alınǵan. Xızmetkerler dáramatların asırıw, olarǵa qosımsha miynet dem alısları beriw, densawlıqların bekkemlew máseleleri turaqlı itibarda bolıp, belsendi xızmetkerlerdi xoshametlep barıw da úlgili shólkemlestirilgen.

Zavod cexlarında iskerlik alıp baratuǵın baslanǵısh kásiplik awkam komitetleri baslıqları (olar 26 adam) ushın jańa qabıl etilgen jámáát shártnaması boyınsha, cexlardan saylanǵan 59 wákil ushın miynet qáwipsizligi boyınsha oqıw -seminarları shólkemlestirildi. Cex hám bólimlerdegi kásiplik awqamı múyeshi, cex kásiplik awqamı kúndeligi, miynet qáwipsizligi boyınsha wákillerge jumıs jobası islep shıǵıldı hám de tarqatıldı.

Miynet veteranlarǵa ayrıqsha  itibar qaratılıp atır Yubiley sánesine jetken xızmetkerlerdi qollap-quwatlaw maqsetinde usı jıl b1 veteranlarǵa materiallıq járdem ajıratılıp hám qımbat bahalı sıylıqlar berildi.

Zavodta miynet qılıp atırǵan islewshilerdiń perzentlerin sawalandırıwda kásiplik awqam komitetiniń turaqlı itibarında. Balalar dem alıw oraylarda islewshilerdiń 200 ge jaqın ul-qızları dem aldırıldı. Barlıq qárejetler tolıq kárxana hám kásiplik awqamı komiteti tárepinen qaplanıp berildi.

Búgingi kúnde ámelge asırılıp atırǵan mámleket siyasatınıń tiykarǵı baǵdarları, keń kólemdegi reformalardıń mazmun-mánisi, qabıl etilgen nızam hújjetleri hám mámleketlik baǵdarlamalarınıń áhmiyetin islewshilerge hár tárepleme túsindiriw maqsetinde hár ayda 2 márte “Máripat saatlar” ı ótkeriw jolǵa qoyılǵan.

Sonıń menen birge kásiplik awqam komiteti is-jobasına muwapıq mámleketimizde keń belgilenetuǵın bayramlar qabatında zavodta islewshiler hám olardıń shańaraq aǵzaları arasında shaxmat, shashka, milliy gúres, tas kóteriw, arkan tartıw, voleybol, futbol, shańaraqlıq sport, basketbol, stol tennisi jarısların shólkemlestiriw ádetiy jaǵdayǵa aynalǵan.

Zavod aymaǵındaǵı “Elabat” poselkasında jaylasqan  52-sanlı mektebinde islewshilerdiń perzentleri bilim aladı. Mektep oqıwshılar ushın taza suw menen támiyinlewde mashqalalar bolmaslıǵı ushın kásiplik awqamı tárepinen 6 dana kuler alıp berildi. Mektep kitapxanası ushın 10 mln. sumlıq kórkem ádebiyatlar, sabaklıklar, oqıw qollanbaları alıp berildi hám kitaplar ushın shkaf hám stellajlar ornatıldı.

Ushırasıw dawamında zavodtıń bir qatar miynetkeshlerge Ózbekstna kásiplik awqamları Federaciyasınıń “Húrmet Jarlıq”ları tapsırıldı.

\