2026-jıl 7-aprel kúni Nókis qalasında Dúnyajúzlik salamatlıq kúni múnásabeti menen ǵalabalıq júriw marafoni hám sport jarısları bolıp ótti.

Bul ilaj Ózbekstan kásiplik awqamları Federaciyasınıń Qaraqalpaqstan Keńes tárepinen shólkemlestirildi. Onda túrli tarawlarda miynet etip atırǵan jas kásiplik awqamları aǵzaları belsendi qatnastı.

Marafon Nókis qalasındaǵı “Doslıq” kanalı boylap ótkerilip, qatnasıwshılar salamat turmıs tárizin úgit násiyatlaw, fizikalıq belsendilikti asırıw hám awızbirshilikti bekkemlewge qaratılǵan bul ilajda úlken qızıǵıwshılıq penen qatnastı.

Sonıń menen birge, ilaj sheńberinde túrli sporttıń júziw, shaxmat, stol tennisi hám darts túrleri boyınsha jarıslar shólkemlestirilip, qatnasıwshılar arasında dostana báseki ortalıǵı jaratıldı. Aktiv qatnasqan jaslar shólkemlestiriwshiler tárepinen xoshametlendi.