Ózbekstan kásiplik awqamları Federaciyasınıń Qaraqalpaqstan Keńesi baslıǵı Ulıǵbek Abılaevich Jalmenov hámde Ózbekstan kásiplik awqamları Federaciyası wákili, Ózbekstan bilimlendiriw hám ilim xızmetkerleri kásiplik awqamı Respublika Keńesi baslıǵı Bedilov Ravshan Melsovichlar menen birgelikte 2024-jıl 26-dekabr kúni Kásiplik awqamları sistemasında uzaq jıllar islegen miynet veteranları menen Ózbekstan kásiplik awqamları Federaciyasınıń Qaraqalpaqstan Keńesi majlisler zalında ushırasıw ótkerildi.

Ushırasıwda kásiplik awqamlarınıń tariyxı hám búgingi kúndegi ámelge asırılǵan jumısları sonıń menen birge, 2025-jılda Ózbekstan kásiplik awqamlarınıń gezektegi IX Qurıltayı hámde 120 jıllıq yubeley bayramın keń belgilew hám olar sheńberinde ótkeriliwi belgilengen bir qatar ilajlar haqqında sóz júritti.

Atap aytqanda, bir qatar kórik tańlaw hám forumlar, konferenciya, ushırasıwlar, kórgizbeli hám sport ilajlar sonıń menen birge, jańadan qurılıp atırǵan bir qatar imaratlar, sonıń ishinde Qaraqalpaqstan Respublikası Bozataw rayonında jańa zamanagów kórinistegi, barlıq qolaylıqlarǵa iye «Bozataw» sanatoriyasınıń paydalanıwǵa tapsırılıw haqqındaǵı maǵlıwmatlar berip ótti.

Sonıń menen birge, miynet veteranlarına qaratılıp atırǵan itibar, ruwxıy hám materiallıq jaqtan qollap-quwatlaw, mádeniy dem alıw, tariyxıy qala hám ziyarat orınlarına sayaxatların shólkemlestiriw hám sistemadaǵı sanatoriylarda densawlıqların bekkemlew sıyaqlı islenip atırǵan jumıslarına minnetdar ekenin bildirdi miynet veteranı Xasen Ermaǵanbetov.

Ilaj sońında, Ózbekstan kásiplik awqamları Federaciyası basshılarınıń jańa jıl bayramı múnásibeti menen bárshe miynet veteranlarına arnalǵan qutlıqlaw hám jańa jıl sawǵaları tapsırıldı.