Qoraqalpog’iston Respublikasining Ellikqal’a tumanida joylashgan “Orol bolalari” bolalar sog’lomlashtirish oromgohida “2025 yil yoz mavsumida bolalarning dam olishini yuqori saviyada tashkil etish” mavzusida hududiy o‘quv-amaliy seminar bo‘lib o‘tdi.

Seminarning asosiy maqsadi – bolalarning xavfsiz, mazmunli va tarbiyaviy dam olishi uchun oromgohlardagi mavsumga tayyorgarlik ishlarini tizimli tashkil etish, mutasaddi vazirlik va idoralar hamkorligini yanada mustahkamlashdan iborat bo‘ldi.

Tadbirda O‘zbekiston kasaba uyushmalari Federatsiyasi Qoraqalpog’iston Respublikasi Kengashi raisi, Bolalarning dam olishini tizimli tashkil etish va sog’lomlashtirish masalalari bo‘yicha Respublika komissiyasi raisi o‘rinbosari U.Jalmenov, departament boshqarmasi boshlig’i R.Madreimov, IIV jamoat xavfsizligi boshqarmasi, Maktabgacha va maktab ta’limi, Madaniyat, Sog’liqni saqlash, Sport vazirliklari, tuman va shahar hokimliklari mas’ullari, barkamol avlod markazlari, maktab va maktabgacha ta’lim muassasalari rahbarlari, oromgoh direktorlari va tarbiyachilar ishtirok etdilar.

Seminar davomida oromgohlarda bolalarning hayoti va xavfsizligini ta’minlash, moddiy-texnik bazani mustahkamlash, 12 kunlik namunaviy dasturni amaliyotga tatbiq etish, ta’lim va tarbiya jarayonlarini boyitish masalalari muhokama qilindi.

2025 yil yoz mavsumida Qoraqalpog’iston Respublikasida jami 11 ta statsionar bolalar oromgohi faoliyat yuritishi belgilangan bo‘lib, ularda 7140 nafar bolalarning dam olishi rejalashtirilgan. Shu bilan birga, shahar va tumanlardagi ta’lim muassasalari, sport maktablari, madaniyat markazlari huzurida tashkil etiladigan 69 ta bolalar sog’lomlashtirish maydonchalari orqali yana 16750 nafar bola qamrab olinadi.

Jami hisobda, yozgi mavsum davomida 23890 nafar bolalarning sog’lom va mazmunli dam olishi ta’minlanadi.

Departament tasarrufidagi Mo‘ynoq tumanidagi “Oq kema”, To‘rtko‘ldagi “Oq kabutar”, Ellikqal’adagi “Orol bolalari”, Taxiatoshdagi “Oydin jol”, Nukus shahridagi “Turon” oromgohlarida joriy ta’mirlash ishlari yakuniga etkazilib, mavsumga to‘liq tayyor holatga keltirildi hamda hududiy komissiyalar tomonidan qabul dalolatnomalari rasmiylashtirildi. Shuningdek, xususiy “Aral” oromgohi ham mavsumga shay etilib, hududiy komissiyalar tomonidan qabul dalolatnomalari rasmiylashtirilishi amalga oshirilmoqda.

Hokimliklar tasarrufidagi ijtimoiy ob’ektlar (maktablar) bazasida tashkil etiladigan oromgohlarda ta’lim jarayoni yakunlanishi bilan joriy ta’mirlash ishlari boshlab yuborildi. Tuman obodonlashtirish bo‘limlari bilan hamkorlikda hududlarda tozalash va ko‘kalamzorlashtirish ishlari amalga oshirilmoqda.

Seminarda ta’lim sohasida faoliyat yuritayotgan tajribali pedagoglar va zirak talabalardan saralab olingan kadrlar asosida oromgohlarda faoliyat yuritadigan tarbiyachi va etakchilarning tayyorgarligi ham muhokama qilindi.

Bolalarning 2025 yilgi yozgi ta’til davrini mazmunli, xavfsiz va yorqin o‘tkazish uchun ishlab chiqilgan chora-tadbirlar doirasida, Respublika komissiyasi majlisining 2025 yil 9 apreldagi 29-sonli bayoniga muvofiq, xalqaro va milliy tajriba asosida tayyorlangan “Yangi O‘zbekiston oromgohlarida bolalarning dam olishini tizimli tashkil etish va sog’lomlashtirish masalalari bo‘yicha 12 kunlik namunaviy dastur” tasdiqlangan.

Ushbu dastur asosida har bir kunga alohida mavzular – “Bolalar festivali”, “Milliy qadriyatlar”, “Ijod va iste’dod”, “Harbiy-vatanparvarlik”, “Sport va salomatlik”, “Turizm va yurtimiz tarixi”, “Millatlar do‘stligi” kabi nomlar berilgan va ular asosida tadbirlar tashkil etiladi.

Seminar so‘ngida savol-javoblar, amaliy takliflar, o‘zaro fikr va tajriba almashuvlar asosida aniq vazifalar belgilandi. Ushbu vazifalar orqali mavsumni yuqori saviyada o‘tkazishga mustahkam asos yaratildi.