2023-жыл 15-февраль күни Нөкис қаласындағы Республикалық ойын түрлери ҳәм жеңил атлетика бойынша қәнигелестирилген спорт мектеби ҳәмде Нөкис олимпия ҳәм параолимпия спорт түрлерине таярлаў орайында өткерилген спорт илажында “Қол тобы” жарысының Қарақалпақстан Республикалық басқышына қала ҳәм районлардағы спорт мектеплери оқытыўшы хызметкерлери ҳәмде ғалаба хабар қураллары ўәкиллери қатнасты.

Жарыс қатнасыўшыларын Өзбекстан мәденият, спорт ҳәм туризм хызметкерлери кәсиплик аўқамы Республикалық кеңесиниң Қарақалпақстан Республикасы бойынша жуўапкер шөлкемлестириўшиси Ж.Аяпов ҳәмде Қарақалпақстан Республикасы Жаслар сиясаты ҳәм спорт министри ў.ў.а. А.Алланазаров спорт жарысы қатнасыўшыларын қызғын қутлықлады.

Өткерилген спорт жарысында 25 командаларда 250 ге шамалас спортшылар қатнасты.

Жарыс жуўмағында жеңимпазлар Мәденият, спорт ҳәм туризм хызметкерлери кәсиплик аўқамы Қарақалпақстан Республикасы бирлескен комитети тәрепинен таярланған қымбат баҳалы саўғалар ҳәм I-II-III-дәрежели дипломлар тапсырылды.

Атап айтқанда, ҳаяллар арасында 1-орынды Республикалық ойын түрлери ҳәм жеңил атлетика бойынша қәнигелестирилген спорт мектеби, 2-орынды Мойнақ районы спорт мектеби ҳәмде 3-орынды Хожели районы спорт мектеби командалары сыйлы орынларды ийеледи.

Ал, еркеклер арасында 1-орынды Республикалық ойын түрлери ҳәм жеңил атлетика бойынша қәнигелестирилген спорт мектеби, 2-орынды Нөкис районы спорт мектеби ҳәм 3-орынды Тахтакөпир районы спорт мектеби командалары сыйлы орынларды ийеледи.

Буннан тысқары ҳаяллар арасында “Ең жасы үлкен қатнасыўшы” номинациясы бойынша Бозатаў районы спорт мектебинен М.Утеўлиева, “Ең ўқыплы қатнасыўшы” номинациясы бойынша Елликқала районы спорт мектебинен М.Бабажанова, “Жеңиске болған интасы ушын” номинациясы бойынша Нөкис қаласы 1-санлы спорт мектебинен Г.Байлепесова  ҳәмде “Ең  жас қатнасыўшы” номинациясы бойынша Қанлыкөл районы спорт мектебинен Р.Илиясовалар жеңимпаз болып табылды.

Еркеклер арасында “Ең жасы үлкен қатнасыўшы” номинациясы бойынша Шымбай районы спорт мектебинен М.Бекимбетов, “Ең ўқыплы қатнасыўшы” номинациясы бойынша Кегейли районы спорт мектебинен С.Бекполатов, “Жеңиске болған интасы ушын” номинациясы бойынша Нөкис қаласы 1-санлы спорт мектебинен Ғ.Шылманов ҳәмде “Ең  жас  қатнасыўшы” номинациясы бойынша Қанлыкөл районы спорт мектебинен З.Аллабаевлар жеңимпаз болып табылды.

Өткерилген “Қол тобы” спорт жарысының Қарақалпақстан Республикасы басқышында сыйлы 1-орынды ийелеген Республикалық ойын түрлери ҳәм жеңил атлетика бойынша қәнигелестирилген спорт мектебиниң ҳаяллар ҳәм еркеклер командасы 2023-жылдың 24-26-февраль күнлери аралығында Ташкент ўәлаятының Чирчиқ қаласындағы Өзбекстан дене тәрбия ҳәм спорт универститетиниң спорт базасында өткерилетуғын Финал басқышына жоллама алды.

Спорт илажы қатнасыўшыларына Қарақалпақстан Республикасы Мәденият ҳәм туризм министрлиги тәрепинен таярланған концерт бағдарламасы қойып берилди.