Búgingi kúnde Globallıq ıqlım ózgeriwi, suw resursları jetispewshiligi hám átirap-ortalıqtıń pataslanıwı sıyaqlı máseleler jayǵana teoriyalıq talqılaw emes, bálki hár bir insannıń kúndelik turmısı, salamatlıǵı hám keleshegine tikkeley tásir kórsetip atırǵan oǵada aktual másele. Sol sebepli, xızmetkerlerdiń qáwipsiz hám taza átirap-ortalıqta miynet etiwin támiyinlew hám de toparlarda ekologiyalıq mádeniyattı qáliplestiriw zamanagóy kásiplik awqamlarınıń ústin turatuǵın wazıypalarınan birine aylanıp atır.

Ózbekstan Respublikası Prezidenti Administraciyasınıń tiyisli bayanlaması hám Ózbekstan kásiplik awqamları Federaciyası Atqarıw Komitetiniń qararı orınlanıwın támiyinlew maqsetinde islengen “Ekologiyalıq belsendi kásiplik awqamı jamááti” Respublika kórik-tańlawınıń Qaraqalpaqstan Respublikası basqıshı tap usı iygilikli maqsetlerge xızmet etti. Ilajda Ózbekstan kásiplik awqamları Federaciyası Qaraqalpaqstan Keńesiniń baslıǵı Ulıqbek Jalmenov, baslanǵısh kásiplik awqamı komitetleri baslıqları hám de tarawdıń belsendileri qatnastı.

Tańlaw juwmaǵına kóre, Ájiniyaz atındaǵı Nókis mámleketlik pedagogika institutı, Moynaq rayonı medicina birlespesi, Qaraqalpaqstan Respublikası Ayrıqsha jaǵdaylar basqarması, “Qaraqalpaq suw támiynatı” AJ hám de Qaraqalpaqstan awıl xojalıǵı hám agrotexnologiyalar institutı komandaları 1-orındı iyeledi. 2-orınǵa Tórtkúl rayonındaǵı 29-sanlı ulıwma bilim beriw mektebi hám de Qanlıkól rayonı medicina birlespesi múnásip kórilgen bolsa, 3-orın Nókis qalasındaǵı 40-sanlı mektepke shekemgi tálim shólkemi jamáátine nesip etti.

Jeńimpazlarǵa shólkemlestiriwshiler tárepinen diplom hám estelik sawǵaları tapsırıldı.

Juwmaq ornında sonı da aytıw kerek, bul sıyaqlı tańlawlar miynet jámáátleri arasında tekǵana salamat báseki ortalıǵın qáliplestirip qalmastan, bálki xızmetkerlerdiń ekologiyalıq juwapkerligin asırıp, tábiyattı saqlap-álpeshlew sıyaqlı iygilikli idea átirapında birlesiwine xızmet etedi.