Nókis mámleket pedagogika institutında Ózbekstan kásiplik awqamları Federaciyası Qaraqalpaqstan Keńesi baslıǵı Ulıkbek Jalmenovtıń jaslar menen ushırasıwı bolıp ótti.

11 noyabr — Ózbekstan kásiplik awqamları kúni múnásabeti menen «Jańa Ózbekstan — jańa kásiplik awqamları» uranı astında shólkemlestirilgen ushırasıwda 100 den aslam jas xızmetker hám studentler qatnastı.

Ushırasıw waqtında jaslardıń baslamaları hám keleshekke bolǵan rejeleri tıńlandı. Jaslardıń miynet iskerligi, kásiplik rawajlanıwı, olardıń huqıq hám máplerin qorǵaw máselelerine bólek itibar qaratıldı.

Ushırasıwdıń eń quwanıshlı sátlerinde jaslardı qollap-quwatlaw hám olardıń miynet hám de tálimdegi háreketlerin xoshametlew maqsetinde kásiplik awqamı stipendiyası hám biypul sanatoriya jollanbası sertifikatları tapsırıldı.

Atap aytqanda, Nókis mámleket pedagogika institutınıń 4-basqısh studenti Qızılbaeva Kúmisay Saparbay qızı kásiplik awqamı stipendiyaǵa iye boldı. Berdaq atındaǵı Qaraqalpaq mámleket universitet studenti Madreymov Múnirbekke bolsa kásiplik awqamı qarjları esabınan biypul sanatoriya jollanbası sertifikat tapsırıldı.

Sonıń menen birge, óziniń belsendiligi hám miynetsúygishligi menen jámáátte húrmetke erisken bir topar xoshametlendi.

Bunday xoshametler jaslar ushın tek ǵana materiallıq qollap-quwatlaw, bálki olardıń miyneti, umtılıwı hám keleshekke bolǵan isenimine bildirilgen joqarı itibar belgisi boldı.

Ushırasıw jaslar hám kásiplik awqamları arasındaǵı birge islesiwdi jáne de bekkemlew, jańa ideya hám baslamalarǵa keń jol ashıw hám de jas áwladti múnásip miynet jáne sociallıq qorǵaw ruwxında qollap-quwatlaw jolında zárúrli qádem boldı.