Qaraqalpakstan Respublikası densawlıqtı saqlaw ministrligi májilisler zalında 12-may-“Xalıq aralıq miyirbiykeler kúni” bayramı munásibeti menen Qaraqalpaqstan Respublikası densawlıqtı saqlaw ministrligi, Ózbekstan densawlıqtı saqlaw xızmetkerleri kásiplik awqamınıń Qaraqalpaqstan Respublikası keńesi, Ózbekstan Hamshiralar Assosaciyasınıń Qaraqalpaqstan bólimi menen birgeliktegi bayram ilajı ótkerildi.

Bayram ilajında Qaraqalpaqstan  Respublikası densawlıqtı saqlaw ministri M.Kurbanov, Ózbekstan kásiplik awqamları Federaciyasınıń Qaraqalpaqstan Keńesi baslıǵınıń orınbasarı M.Daniyarov, Ózbekstan Hamshiralar Assosaciyasınıń Qaraqalpaqstan bólimi baslıǵı R.Mishenovalar qatnastı.Ilaj barısında medicina tarawında kóp jıllıq pidayı miynetleri ushın 5 orta buwın medicina xızmetkerlerine Ózbekstan densawlıqtı saqlaw xızmetkerleri kásiplik awqamı Respublikalıq Keńesiniń Húrmet jarlıǵı hám bahalı sawǵaları tapsırıldı. Sonday-aq, bayram ilajında orta buwın medicina xızmetkerleri arasında ótkerilgen «Jıldıń eń jaqsı orta medicina hám farmacevtika xızmetkeri», “Patronaj akusherka-hayal salamatlıǵınıń tayanıshı” hám taraw mákemelerinde jumıs islep atırǵan miyirbiykelerdiń 7-10 jas aralıǵındaǵı perzentleriniń qatnasıwında ótkerilgen «Meniń anam miyirbiyke» súwret salıw tańlawlarınıń Qaraqalpaqstan Respublikası basqıshınıń jeńimpazları Qaraqalpaqstan Respublikası densawlıqtı saqlaw ministrligi menen Ózbekstan densawlıqtı saqlaw xızmetkerleri kásiplik awqamınıń Qaraqalpaqstan Respublikası keńesiniń birgeliktegi tiyisli dárejedegi diplomları hám Keńes tárepinen tayarlanǵan bahalı sawǵaları menen sıylıqlandı.

Bunnan tısqarı, «Jıldıń eń jaqsı orta medicina hám farmacevtika xızmetkeri» tańlawı hám “Patronaj akusherka-hayal salamatlıǵınıń tayanıshı” kórik-tańlawınıń jeńimpazlarına Qaraqalpaqstan Respublikası densawlıqtı saqlaw ministrligi hám Ózbekstan Hamshiralar Assosaciyasınıń Qaraqalpaqstan bóliminiń birgeliktegi diplom hám sawǵaları tapsırıldı.